2015-06-25
ნავთლუღის სასწავლო ცენტრის პოლიგონზე გამჭიმი მოწყობილობების ტესტირება განხორციელდა
ნავთლუღის სასწავლო ცენტრის პოლიგონზე, ელექტროგადამცემი ხაზების სადენების და ოპტიკურ-ბოჭკოვანი კაბელის დასამონტაჟებელი მოწყობილობის ტესტირების სამუშაოები განხორციელდა.
როგორც საზოგადოებისთვის ცნობილია, SCADA-ს პროექტის ფარგლებში, „საქართველოს სახელმწიფო ელექტროსისტემა“-ში წარმატებით მიმდინარეობს ოპტიკის გაჭიმვის სამუშაოები. სსე-ის კუთვნილი ქვესადგურების უმრავლესობაში სამუშაოები უკვე დასრულებულია. კომპანიაში ჩამოყალიბდა ელექტროგადამცემი ხაზების რეაბილიტაციის დასავლეთისა და აღმოსავლეთის განყოფილებები, რომლებიც სსე-ის ბალანსზე არსებული ძველი, ამორტიზირებული ხაზების რეაბილიტაციას ახორციელებენ.
2014 წელს, აღნიშნული პროექტებისთვის კომპანია USAID-ის დახმარებით შეძენილი იქნა გამჭიმი მოწყობილობები, რომლის საშუალებითაც ელექტროგადამცემ ხაზზე „პალიატომი -1“ ძველი, მეხამრიდი გვარლის დემონტაჟი და ახალი ოპტიკურ-ბოჭკოვანი კაბელის მონტაჟის სამუშაოები განხორციელდა. სამუშაოების და სარეაბილიტაციო პროცესის უწყვეტ რეჟიმში განხორციელების შედეგად, აღმოფხვრილია 2013 წელს „პალიასტომი-1,2“-ზე მომხდარი ავარიის ყველა შედეგი. რეაბილიტაციის პროექტი ერთი კვირის წინ დასრულდა. ამ ეტაპზე ელექტროგადამცემ ხაზზე „პალიატორმი-2“ ანძის გამაგრების სამუშაოები მიმდინარეობს.
საქართველოს ენერგოსისტემის ძირითად გადამცემ საშუალებებს 220 კვ.იანი ელექტროგადამცემი ხაზები წარმოადგენს. იმის გათვალისწინებით, რომ ჩვენი ქვეყნის მთა-გორიანი რელიეფი არ იძლევა დიდი ზომის მოწყობილობების და სპეც-ტექნიკის თავისუფლად გადაადგილების საშუალებას, მიღებული იქნა გადაწყვეტილება, აღმოსავლეთ საქართველოს ჯგუფისთვის დამატებით, 220 კვ-ის მცირე ზომის გამჭიმი მოწყობილობების შეძენის შესახებ, რაც კომპანიის სამომავლო გეგმების განსახორციელებლად (ელექტროგადამცემი ხაზის „სათაფლია“ გაორჯაჭვიანება; ელ/გად/ხაზის „აჯამეთი“ რეაბილიტაცია) მნიშვნელოვან ფაქტორს წარმოადგენს.
უახლოეს მომავალში ოპტიკურ-ბოჭკოვანი კაბელის მონტაჟის სამუშაოები დაიწყება ელექტროგადამცემ ხაზებზე: ,,მანავი-220“ და ,,თონეთი-2“.
პროცესი ერთი თვეში დაიწყება და 2015 წლის ბოლოსთვის დასრულდება.
