თანამშრომლობის პროგრამები
EU4Energy პროგრამა
EU4Energy არის საერთაშორისო ენერგეტიკული სააგენტოს (IEA), ევროკავშირის, აღმოსავლეთ პარტნიორობის (EaP) და ცენტრალური აზიის ქვეყნებისა და სხვა განმახორციელებელი მხარეების თანამშრომლობა, რომელიც მიზნად ისახავს პროგრამის მონაწილე ქვეყნების მისწრაფებების მხარდაჭერას მდგრადი ენერგეტიკული პოლიტიკის განხორციელებისა და ენერგეტიკული სექტორის კოოპერატიული განვითარების ხელშეწყობის მიმართულებით რეგიონულ დონეზე. EU4Energy პროგრამა დაფინანსებულია ევროკავშირის მიერ.
პროგრამის პირველი ფაზა მიმდინარეობდა 2016 წლის ივლისიდან 2022 წლის ივნისამდე და ფოკუსირებული იყო აღმოსავლეთ პარტნიორობის (EaP) და ცენტრალური აზიის ქვეყნებზე: სომხეთი, აზერბაიჯანი, ბელარუსი, საქართველო, ყაზახეთი, ყირგიზეთი, მოლდოვა, ტაჯიკეთი, თურქმენეთი, უკრაინა და უზბეკეთი. EU4Energy ეფუძნება გრძელვადიანი INOGATE პროგრამის წარმატებას და მიჰყვება ევროკავშირსა და ბენეფიციარ ქვეყნებს შორის შეთანხმებულ რეგიონული თანამშრომლობის მიზნებს.
ევროკავშირმა განაახლა EU4Energy პროგრამა მეორე ფაზისთვის, რომელიც 2021 წლის ივლისიდან 2025 წლის დეკემბრამდე გაგრძელდა და ფოკუსირებული იყო მხოლოდ ევროკავშირის აღმოსავლეთ პარტნიორობის ქვეყნებზე: სომხეთი, აზერბაიჯანი, საქართველო, მოლდოვას რესპუბლიკა და უკრაინა.
EU4Energy პროგრამის მესამე ფაზა დაიწყო 2026 წლის 1 იანვარს და გაგრძელდება 2028 წლის 31 დეკემბრამდე და კვლავ ფოკუსირებული იქნება აღმოსავლეთ პარტნიორობის ქვეყნებზე.
პროგრამის მიზანია ენერგეტიკული მონაცემების შესაძლებლობების გაუმჯობესება და ბენეფიციარი ქვეყნების მონაცემთა შეგროვებისა და მონიტორინგის გაძლიერება. ის ასევე ეხმარება მათ მტკიცებულებებზე დაფუძნებული ენერგეტიკული პოლიტიკის შემუშავებაში. IEA პასუხისმგებელია პროგრამის ოთხ კომპონენტზე, რომლებიც ეხება ენერგეტიკული მონაცემების მართვას და გამოყენებას, მდგრად ენერგიას, ენერგეტიკულ უსაფრთხოებას, კომუნიკაციასა და ხილვადობას.
გარდა ამისა, EU4Energy პროგრამა უზრუნველყოფს ტექნიკურ დახმარებას საკანონმდებლო და მარეგულირებელ ჩარჩოებსა და ენერგეტიკული ინფრასტრუქტურის ძირითად ინვესტიციებზე აღმოსავლეთ პარტნიორობის ქვეყნებისთვის, ენერგეტიკული გაერთიანების სამდივნოსა და ევროპის ენერგეტიკის მარეგულირებელი ორგანოების საბჭოს (CEER) მეშვეობით.
