2022-09-06
„საქართველოს სახელმწიფო ელექტროსისტემა“ CIGRE-ს საერთაშორისო სიმპოზიუმზე
საფრანგეთში ელექტრული სისტემების საერთაშორისო საბჭოს (CIGRE) სიმპოზიუმი გაიმართა, რომელშიც „საქართველოს სახელმწიფო ელექტროსისტემის“ დირექტორთა საბჭოს წევრმა და CIGRE - საქართველოს ეროვნული კომიტეტის თავმჯდომარემ გიორგი ამუზაშვილმა მიიღო მონაწილეობა.
სიმპოზიუმზე განხილული იყო თანამედროვე ელექტროენერგეტიკული სისტემების ისეთი მნიშვნელოვანი გამოწვევები, როგორებიცაა: განახლებადი ენერგიის წყაროების ქსელში ინტეგრაცია, ელექტროენერგიის ეფექტურად გამოყენება, დივერსიფიცირების გზები და მეზობელ ქვეყნებთან ენერგეტიკული კავშირების გაძლიერება.
CIGRE - საქართველოს წარმომადგენლებს დათმობილი ჰქონდათ სადისკუსიო პანელი, სადაც განიხილეს საქართველოს ენერგეტიკული სისტემის ამჟამინდელი გამოწვევები და სამომავლო განვითარების გეგმები.
სიმპოზიუმის ფარგლებში, გიორგი ამუზაშვილმა მონაწილეობა მიიღო CIGRE-ს სამხრეთ-აღმოსავლეთ ევროპის ქვეყნების ტექნიკური საბჭოს შეხვედრაში, დაესწრო სესიებს გადამცემი ქსელის განვითარების, ოპერირებისა და ეკონომიკის ასპექტების შესახებ. გამართა სამუშაო შეხვედრები სხვადასხვა კომპანიების წარმომადგენლებთან, მათ შორის Siemens-თან სარელეო დაცვის პროგრამების გაუმჯობესების საკითხებზე, SEL-თან და General Electric-თან.
ვიზიტი ასევე მოიცავდა შეხვედრას რუმინეთის გადამცემი ქსელის ოპერატორის მენეჯმენტთან, სადაც განხილული იქნა საქართველო-რუმინეთის დამაკავშირებელი შავი ზღვის წყალქვეშა კაბელის პროექტის სამომავლო პერსპექტივები.
2018 წლიდან, "საქართველოს სახელმწიფო ელექტროსისტემის" ინიციატივით, ფუნქციონირებს CIGRE - საქართველოს ეროვნული კომიტეტი, რომელიც პირველი ეროვნული კომიტეტია რეგიონის მასშტაბით და მის ძირითად ფუნქციას საქართველოს ენერგოსისტემის შესახებ ელექტროენერგეტიკულ სამეცნიერო წრეებში ცნობადობის გაზრდა და ევროპელი და ქართველი ინჟინრების დაახლოება წარმოადგენს.
